កម្ពុជាពង្រឹងសន្តិសុខក្រោយអំពើភេរវកម្មនិង ជាម្ចាស់ផ្ទះការប្រកួតជម្រុះបាល់ទាត់ពិភពលោក
18-November-2015 | ដោយ ពល រាជសី
ភ្នំពេញ ៖ អគ្គស្នងការនគរបាលជាតិ ឯកឧត្តម នាយឧត្តមសេនីយ៍ នេត សាវឿន បានបញ្ជាឲ្យកងកម្លាំងនគរបាលនៅតាមរាជធានី-ខេត្ត ពង្រឹងការការពារសុវត្ថិភាព សន្តិសុខ សណ្តាប់ធ្នាប់ ជូនប្រជាពលរដ្ឋ ភ្ញៀវទេសចរណ៍ អ្នកវិនិយោគ និងបណ្ដាស្ថានទូតនានា ដែលមានទីតាំងនៅក្នុងប្រទេសកម្ពុជា ក្រោយពេលដែលកើតមានអំពើភេរវកម្មស្លាប់មនុស្សរាប់រយនាក់ នៅទីក្រុងប៉ារីស ប្រទេសបារាំង កាលពីពេលថ្មីៗនេះ។
ថ្លែងនៅក្នុងពិធីប្រកាសផ្ទេរភារកិច្ច តែងតាំងមុខតំណែង និងដំឡើងឋានន្តរសក្តិជូននាយនគរបាលជាន់ខ្ពស់ នាព្រឹកថ្ងៃទី១៧ ខែវិច្ឆិកា ឆ្នាំ២០១៥ នៅអគ្គស្នងការដ្ឋាននគរបាលជាតិ ឯកឧត្តម នាយឧត្តមសេនីយ៍ នេត សាវឿន បានមានប្រសាសន៍ថា ក្នុងរយៈពេលប៉ុន្មានថ្ងៃ កងកម្លាំងនគរបាលត្រូវបានពង្រាយ ដើម្បីរក្សាសុវត្ថិភាព សន្តិសុខ សណ្តាប់ធ្នាប់ នៅរាជធានីភ្នំពេញ និងតាមបណ្ដាលខេត្ត ក្រោយពីកើតមានអំពើភេរវកម្មពិភពលោក ជាពិសេសនៅទីក្រុងប៉ារីស ប្រទេសបារាំង។
ឯកឧត្តម នាយឧត្តមសេនីយ៍ បានមានប្រសាសន៍ទៀតថា ការពង្រឹង និងរក្សាសុវត្ថិភាព សន្តិសុខ សណ្តាប់ធ្នាប់នាពេលនេះ ក៏ចំពេលដែលកម្ពុជាត្រូវធ្វើជាម្ចាស់ផ្ទះក្នុងការប្រកួតជម្រុះបាល់ទាត់ពិភពលោកជាមួយនិងប្រទេសជប៉ុន ។ ម្យ៉ាងវិញទៀតហើយនៅប៉ុន្មានថ្ងៃខាងមុខនេះទៀត នឹងមានការប្រារព្ធព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក។ ជាពិសេសទៅទៀត កម្ពុជានឹងទទួលដំណើរបំពេញទស្សនៈកិច្ចជាផ្លូវការរបស់ ឯកឧត្តមនាយករដ្ឋមន្ត្រីរុស្សី ទាំងនៅរាជធានីភ្នំពេញ និងខេត្តសៀមរាប ដែលនេះចាត់ទុកថាជាលើកទីមួយដែល ឯកឧត្តមនាយករដ្ឋមន្ត្រី អញ្ជើញមក ហើយនេះក៏ជាបញ្ហាមួយដែលកងកម្លាំងត្រូវប្រមូលផ្តុំចំណុចខ្ពស់ដើម្បីធ្វើកិច្ចការងារការពារ ៕
ចំនួនអ្នកទស្សនា
- ថ្ងៃនេះ6631
- ម្សិលមិញ12561
- សប្តាហ៍នេះ34581
- ខែនេះ56461
- ឆ្នាំនេះ56461
- សរុប20498917